Leyndardómar Thailands

10. nóvember til 30. nóvember 2017.

Dagana 10. nóvember til 30. nóvember 2017, munum við ferðast og forvitnast um „Leyndardóma Thailands“. Þetta er sjötta árið í röð sem við förum þessa ferð, enda hefur þetta verið vinsælasta Thailandsferðin okkar undanfarin ár. Hér neðst á síðunni er hægt að lesa nokkra umsagnir um ferðina.  Þema ferðarinnar er sem fyrr NÁTTÚRA – SAGA – UPPLIFUN – AFSLÖPPUN, að viðbættri smá verslun í lokin. Eftir að komið er til Thailands verður dvalið í tvo daga í Bangkok þar sem áhugavert er að upplifa söguna, menninguna og mannlífið. Þá tekur við níu daga ferð norður í land sem endar með heimsókn í Gullna Þríhyrninginn á mörkum Thailands, Burma og Laos, en þar verður m.a. skroppið yfir til Laos. Þessi hluti ferðarinnar einkennist af mikilli sögu og náttúruupplifun auk þess sem við munum kynna okkar landbúnað á svæðinu og heilsa upp á bændur. Við kveðjum síðan Gullna Þríhyrninginn og tökum flugið niður til Bangkok og förum þaðan út í paradísareyjunna Koh Chang sem er rétt við landmærin að Kambódíu, en eyjan er frábær staður til afslöppunar. Ferðin endar síðan í Bangkok þar sem við dveljum í aðal verslunarhverfinu og „fyllum“ töskurnar fyrir heimferðina. Sjá nánari ferðaáætlun hér að neðan en myndir úr fyrri ferðum er að finna á Facebook síðunni okkar „Ferðaskrifstofan“ undir myndasöfn.

 

Dagur 1: Keflavík - Kaupmannahöfn – Bangkok.
10. nóvember: Brottför frá Keflavík kl. 08:00 og flogið með Icelandair til Kaupmannahafnar, áætluð lending þar kl. 12:00. Brottför frá Kaupmannahöfn kl. 13:50 með Thai Airways og áætluð lending í Bangkok kl. 06:20 að morgni.

Dagur 2: Komið til Bangkok.
11. nóvember: Við munum lenda á Suvarnabhumi alþjóðarflugvellinum við Bangkok snemma morguns og þaðan farið á hótel í Kínahverfinu í borginni. Akstur frá flugvelli á hótel ca. 60 mín. Það bíður okkar morgunverður á hótelinu og herbergin verða tilbúin þegar við komum en það verður afslöppun fram undir hádegi. Kínahverfið er spennandi og áhugaverður heimur út af fyrir sig en við munum ganga um hverfið á leið okkar í hádegismat, sem verður á Suptra River House Restaurant. Eftir hádegisverð verður farið í siglingu um síki borgarinnar. Bangkok byggðist upp á bökkum Chao Phraya árinnar og á nítjándu öldinni voru í borginni mikið af síkjum og skurðum út frá ánni sem hægt var að sigla eftir. Þá voru bátar aðal farartæki borgarinnar, enda borgin oft kölluð „Feneyjar austursins“  Nú er búið að fylla upp í flest þessara síkja en ekki öll og munum við fara í siglingu um þau og kynnast mannlífinu og byggðinni á bökkum þeirra. Við siglum m.a. fram hjá hofinu „Wat Arun“ en það er einnig þekkt sem „Temple of Dawn“. Hofið sem er a.m.k. frá 17. öld, stendur á bökkum Chao Phraya árinnar og er eitt af kennileitum borgarinnar. Hofið er m.a. þekkt fyrir 79 metra háan turn sem þakinn er „mósaík“ og glitrar því sérkennilega í sólinni. Hádegisverður á „local“ veitingastað.
Gisting: Grand China Hotel. (M/H)

Dagur 3: Bangkok.
12. nóvember: Þennan dag verður farið í skoðunarferð um Bangkok. Ferðin hefst með heimsókn í Grand Palace og Wat Phra Keo. Konungur Thailands bjó forðum í Grand Palace og eru þar margar merkar byggingar auk þess sem við kynnumst þar vel sögu landsins og byggingarlist. Merkasta byggingin á svæðinu er Wat Phra Keo en þar innandyra er „Emerald Buddha“ sem er það buddalíknesi sem mestur átrúnaður er bundin við á Thailandi. Á Grand Palace svæðinu er margt að sjá og mynda, en óheimilt er að taka myndir af „Emerald Buddaha“ líkneskinu sjálfu. Þá er komið að hofinu „Wat Chetuporn“ sem er betur þekkt sem Wat Po en þar er m.a. 45 metra langt Buddha líkneski. Wat Po er þekkt fyrir að þar var fyrsta miðstöð alþýðumenntunar í landinu og er hofið stundum kallað fyrsti háskólinn auk þess sem þetta er talið vera „heimili“ Thailenska nuddsins. Hádegisverður verður snæddur á „local“ veitingastað í ferðinni. „Frí“ frá skipulagri dagskrá er síðan það sem eftir er dagsins.
Gisting: Grand China Hotel (M/H)

Dagur 4: Bangkok – Tak
13. nóvember: Eftir morgunverð er farið af Grand China hótelinu og haldið niður að Chao Phraya ánni þar sem farið er um borð í ferjuna „Pearl of Siam“. Með ferjunni verður siglt upp eftir ánni og fáum við þar gott tækifæri til þess að skoða borgina frá því sjónarhorni. Frá Bangkok verður siglt áleiðis að Ayutthaya fyrrum höfuðborgar Siam, nú Thailands.  Borgin var lögð í rúst af herjum Myanmar (Burma) 1767 og er áhugavert að skoða rústirnar og fræðast um sögu borgarinnar. Snæddur verður hádegisverður um borð í ferjunni en siglingarleiðin býður upp á fjölskrúðugt umhverfi, allt frá iðandi stórborginni yfir í afslappaða sveitarsæluna. Frá Ayutthaya verður haldið akandi norður til bæjarins Tak en þangað eru ca. 300 km. Tak stendur við fljótið Ping sem var áður aðal vöruflutningsleiðin til nágrannalandsins Myanmar, nú Burma. Kvöldverður á Krua Kraset Restaurant.
Gisting: Viang Tak Riverside Hotel. (M/H/K)

Dagur 5: Tak – Mae Sot
14. nóvember: Eftir morgunverð verður haldið af stað „út í náttúruna“ en hægt er að segja að þessi dagur, eins og reyndar flestir dagar ferðarinnar, einkennist af mikilli náttúruupplifun.  Þennan dag verður farið um svæði sem er rétt við landamæri Myanmar (Burma). Þar mun hópurinn kynnast framandi ættbálkum sem búa á svæðinu og heimsækja einn þeirra. Þar munum við munum ganga um þorpið og kynna okkur lifnaðarhætti fólksins og jafnvel „kíkja í heimsókn“ inn á eitt heimilið. Síðan verður farið í göngu um frumskóginn þar sem við fáum fræðslu um hvernig hægt er að búa í frumskóginum og nýta sér hann á sjálfbæran hátt. Frumskógargangan endar síðan á bökkum Mai La Mao ánni en þar bíða eftir okkur gúmmíbátar sem siglt verður með niður eftir ánni. Frumskógargangan er tvískipt og er fyrri hlutinn á þægilegum skógarstígum sem henta flestum en seinni  hlutinn er strembnari og ekki fyrir alla, en fyrir þá sem ekki ganga alla leið þá er hægt að fara aftur í bílinn sem ekur þeim að gúmmíbátunum. Siglingin er ógleymanleg í einstakri náttúrufegurð og ætti að henta öllum. Frumskógarferðin endar síðan með hádegsiverði á „local“ veitingastað. Á þessu svæði er hægt að upplifa náttúru, menningu og mannlífi sem er algjör andstæða við það sem hópurinn hefur þá kynnst í Bangkok. Eftir matinn verður farið til bæjarins Mae Sot sem er við landamærin að Myanmar (Burma), kíkjum á landamæramarkaðinn og lítum aðeins yfir landamærin áður en farið verður á hótelið sem gist verður á. Kvöldverður á Kao Mao Kao Fang Restaurant í Mae Sot, en staðurinn sjálfur hefur af mörgum verið kallaður „náttúruparadís“.
Gisting: Centara Mae Sot Hill Resort.  (M/H/K)

Dagur 6:  Mae Sot – Chiang Mai
15.  nóvember: Eftir morgunverð verður lagt af stað til Chiang Mai en þangað er ca. 400 km akstur. Á þessari leið verður farið um svæði sem af mörgum er talið eitt fallegasta landsvæði Thailands. Hópurinn öðlast innsýn í lífið í þorpunum sem verða á leið hans, skoðar hrísgrjónastalla og grænan og gróskumikinn regnskóginn. Hádegisverður snæddur á leiðinni og komið síðla dags til höfuðborgar norður Thailands, Chiang Mai. Kvöldverður á veitingastað hótelsins.
Gisting: Chaing Mai Plaza Hotel (M/H/K)

 

Dagur 7: Chiang Mai
16. nóvember: Hvíldardagur í Chiang Mai, sem verður kærkomin eftir stífa dagskrá dagana á undan. Hægt að slappa af við sundlaugina, rölta um bæinn eða skoða fjölmarga áhugaverða staði sem er að finna í borginni. Um kvöldið verður farið á næturmarkaðinn sem er stutt frá hótelinu. Hádegis- og kvöldverður á hótelinu.
Gisting: Duangtawan Hotel (M/H/K)

Dagur 8: Chiang Mai
17. nóvember: Norður hluti Thailands þar sem Chiang Mai er staðsett, var fyrr á öldum lokað frá öðrum hlutum landsins árum saman og er því saga svæðisins og menning um margt ólík öðrum hlutum Thailands. Á árunum 1281-1556 var borgin höfuðborg Lanna ríkisins, sem náði frá mið-Thailandi í suðri til Laos í norðri. Lanna mætti þýða sem „milljónir af hrísökrum“ sem segir okkur að þetta hafi verið auðugt ríki og eins hver verðmætin voru á þessum tíma. Chiang Mai er ein áhugaverðasta borg Thailands og er margt að sjá og skoða, bæði í borginni sjálfri og utan hennar. Í borginni eru rúmlega 300 hof og er Doi Suthep „helgast“ þeirra. Hofið stendur á hæð sem er í rúmlega 1.000 metra hæð og er útsýnið úr hofinu yfir Chiang Mai og nágrenni þess, hreint út sagt stórkostlegt. Eftir morgunverð verður Doi Suthep hofið heimsótt og síðan haldið til bæjarins Sangkamphang eftir að hafa snætt hásegisverð á „local“ veitingastað. Bærinn Sangkamphang er þekktur fyrir glæsilegt handverk og forn vinnubrögð. Litið verður við hjá handverksfólki við vinnu sína en þetta eru m.a. silfursmiðir, vefarar, tréskurðarmeistarar og einnig verður skoðað hvernig hinar litríku sólhlífar eru framleiddar. Síðan er farið aftur til Chiang Mai.
Gisting: Duangtawan Hotel. (M/H)

 

Dagur 9: Chiang Mai – Thaton
18. nóvember: Eftir morgunverð verður lagt af stað norður til Thaton. Á leiðinni þangað verður komið við á fílabúgarði, en þar kynnist hópurinn þessum stóru og gáfuðu skepnum. Á staðnum er boðið upp á fílasýningu auk þess sem hægt er að skoða frumskóginn á fílabaki. Fílareiðin er ekki innifalið í verði ferðarinnar en einnig er hægt að skella sér á fílabak á eyjunni Koh Chang þegar þangað verður komið. Hádegisverður á „local“ veitingastað, en þar er m.a. hægt að skoða einstaklega fallegar orkídeur. Á leiðinni til Thaton verður komið við á ökrunum og heilsað upp á bændur. Eftir að komið er til Thaton innritar hópurinn sig á hótelið sem stendur á fallegum stað með útsýni yfir Meakok fljótið. Kvöldverður á hótelinu.
Gisting: Meakok River Village Resort. (M/H/K)

Dagur 10: Thaton
19. nóvember: Afslöppun í Thaton, en eftir hádegi verður farið í gönguferð til bæjarins Thaton og þaðan upp að einstaklega fallegu hofi sem stendur fyrir ofan bæinn. Frá hofinu er falllegt útsýni bæði yfir Thailand og Burma. Þegar komið er til baka hefur verið vinsælt að taka stutt námskeið í thailenskri matargerð. Maekok River Village Resort er frábær staður til afslöppunar í dásamlegu umhverfi og velja margir að sleppa gönguferðinni og velja þess í stað að slappa af og njóta til hins ítrasta.
Gisting: Maekok River Village Resort. (M/H/K)

Dagur 11: Thaton – Chiang Rai
20. nóvember: Eftir morgunverð verður farið niður að Maekok fljótinu og þar um borð í fljótabát (long tail) sem siglt verður  með til Chiang Rai. Náttúrufegurðin er ólýsanleg á þessum slóðum og siglingaleiðin einstaklega falleg. Siglt verður meðfram mörgum smáþorpum sem staðsett eru við fljótið en á þessum slóðum búa margir minnihlutahópar. Þessir þjóðflokkar hafa flúið til landsins frá nágrannalöndunum, s.s. Burma, Laos, Tíbet  og Kína. Helst þjóðarbrotin á svæðinu eru Akha-, Hmong-, Lisu-, Karen-, Lahu- og Mienfólk. Eftir að komið er til Chaing Rai verður snæddur hádegisverður á hótelinu en við gistum á Dusit Island Resort Chaing Rai. Það sem eftir lifir dags er á eigin vegum.
Gisting: Dusit Island Resort Chaing Rai. (M/H)

Dagur 12: Chiang Rai
21. nóvember: Eftir morgunverð er lagt af stað í skoðunarferð um Chiang Rai og nágrenni. Farið verður í Gullna Þríhyrninginn, en það er fljótasvæði við landamæri Thailands, Laos og Myanmar (Burma) sem þekkt var fyrir ópíum sölu og smygl hér áður fyrr. Við munum heimsækja „Hvíta Hofið“ en það hof er einstakt í Thailandi, hvað varðar sögu og útlit. Komið verður við í þorpum hjá ættbálkum sem áður fyrr höfðu sitt lifibrauð af ópíumrækt og sölu, m.a. hjá „Long neck“ fólkinu. Farið verður í siglingu á Mekong fljótinu með stuttri viðkomu í Laos. Áhugaverður dagur í fallegu umhverfi. Hádegisverður í Imperial Golden Triangle. Eftir að komið er aftur til Chiang Rai er kvöldverður á hótelinu.
Gisting: Dusit Island Resort Chiang Rai. (M/H/K)

Dagur 13: Chiang Rai – Bangkok - Koh Chang
22. nóvember: Eftir morgunverð er ekið út á flugvöllinn í Chiang Rai og er brottför þaðan kl. 7:20 og áætluð lending í Bangkok kl. 8:45. Frá flugvellinum í Bangkok verður ekið í suðurátt til bæjarins Trat en frá Trat er ferjan tekin til eyjunnar Koh Chang. Komið til Koh Chang síðla dags og gist á Chai Chet Resort. Næstu daga verður dvalið í eyjunni en þessir dagar eru hugsaðir til afslöppunar eftir gott ferðalag um landið. Í eyjunni er þó ýmislegt í boði þegar að það kemur að afþreyingu og mun fararstjóri fara yfir það á staðnum og skipuleggja dagana í samráði við hópinn.
Gisting: Chai Chet Resort, Koh Chang.  (M)

Dagur 14 – 18:  Koh Chang
23. til 27. nóvember: Ekki er ósennilegt að einhverjir vilji taka því rólega á Koh Chang til að byrja með, því eyjan er kjörinn staður til afslöppunar. Eyjan er hluti af þjóðgarði og því lögð áhersla á rólegheit á staðnum. Til dæmis er ekki leyfilegt að vera með Jet ski eða önnur „hávaðatæki“ á svæðinu. Fyrir þá sem vilja sjá meira af eyjunni þá er t.d. hægt að leigja sér kajak og dóla á kyrrlátum öldunum meðfram ströndinni. Einnig er hægt að fara í göngu um eyjuna með leiðsögn. Koh Chang er fjalllend og þakin frumskógi að mestu og því ekki ráðlegt að fara langt inn í skóginn án leiðsagnar. Fyrir þau sem eiga eftir að fara á fílabak í ferðinni, eða vilja skella sér aftur, þá er hægt að fara skemmtilega ferð inn í frumskóginn sem endar með því að fá sér sundsprett með fílunum.
Mælt er með því að allir prófi að fara í „snorkl-ferð“ til nærliggjandi eyja. Þetta eru dagsferðir þar sem stoppað á nokkrum stöðum til að „snorkla“ og njóta náttúrunnar.
Gisting: Chai Chet Resort, Koh Chang.  (M)

Dagur 19: Koh Chang – Bangkok
28. nóvember: Eftir morgunverð verður farið í ferjuna sem flytur hópinn yfir til meginlandsins, ca. 30 mín sigling. Frá ferjunni verður stefnan tekin á Bangkok, ca. 5 klst akstur.
Gisting: Centara Watergate Pavilion Hotel

Dagur 20: Koh Chang – Bangkok
29. nóvember: Þessi dagur er hugsaður sem verslunardagur í verslunarparadísinni Bangkok, fyrir þá sem hafa áhuga á því. Annars er hægt að skoða sig um og upplifa borgina með öllum sínum sérkennum. Gist verður í aðal verslunarhverfi borgarinnar, t.d. rétt við MBK  og Central World verslunarmiðstöðvarnar. Lagt af stað frá hótelinu út á flugvöll um kvöldmat.

Dagur 21: Bangkok - Kaupmannahöfn -  Keflavík
30. nóvember: Brottför frá Bangkok kl. 00:50 til Kaupmannahafnar og er áætluð lending þar kl. 06:35. Frá Kaupmannahöfn verður síðan haldið kl. 13:20 og er áætluð lending í Keflavík kl. 15:30.

Verð kr. 587.700,- pr. mann í tvíbýli

Aukagjald kr. 69.700,- pr. mann í einbýli

Innifalið í verði:
* Akstur frá flugvelli í Bangkok á hótel.
* Gisting í 2 nætur með morgunverði á Grand China Princess Hotel Bangkok.
* Gisting í 9 nætur með morgunverði í hringferðinni norður í land, sjá ferðalýsingu.
* Flug frá Keflavík til Bangkok.
* Flug frá Bangkok til Chiang Mai.
* Flug frá Chiang Rai til Bangkok.
* Gisting í 6 nætur með morgunverði á Chai Chet Resort, Koh Chang.
* Gisting í 1 nótt með morgunverði á Centara Watergate Pavilion Hotel Bangkok .
* Skoðunarferð um Bangkok, Grand Palace ofl.
* Enskumælandi thailenskur leiðsögumaður 11. til 22. nóvember
* Fullt fæði í 5 daga.
* Hálft fæði 4 daga.
* Heimsókn í hið einstaka Doi Suthep hof við Chiang Mai.
* Hálfsdagsferð í handverksbæinn Sangkamphang við Chiang Mai.
* Heimsókn í fílabúgarð, boðið er upp á skemmtilega sýningu þar sem fílarnir leika listir sínar.
* Heimsóknir í nokkur fjallaþorp,
* Heimsækjum m.a. „Long neck“, Akha, Yao (lu mien) og Lahu þjóðflokkana.
* Sigling á Maekok River frá Thaton til Chiang Rai.
* Dagsferð í „Gullna Þríhyrninginn“.
* Sigling á Mekong ánni með stoppi í Laos.
* Akstur og sigling frá Bangkok til Koh Chang.
* Akstur og sigling frá Koh Chang til Bangkok.
* Akstur frá hóteli í Bangkok út á flugvöll.
* Ásamt öðru sem fram kemur í ferðalýsingu.
* Íslensk fararstjórn.

Ekki innifalið í verði:
* Forfalla- ferða- og slysatryggingar.
* Drykkir.
* Ferðir sem eru í boði á „frídögum“.
* Þjórfé fyrir leiðsögumenn og bílstjóra.

 

Umsagnir ferðafélaga út síðustu ferð um "Leyndardóma Thailands"

Hildur Ósk Sigurðardóttir.

Ég er að fletta í gegnum myndirnar úr Tælandsferðinni frábæru og ákvað að koma með smá sýnishorn af skemmtilegu andstæðum úr ferðinni. Upplifunin af bæði landi og þjóð var hreint alveg frábær, innfæddir koma ferðamanninum fyrir sjónir sem brosmilt, jákvætt og og einstaklega kurteist fólk. Náttúran er dásamleg, mikil gróska og fjölbreytni í plöntum það er því óneitanlega mikil andstæða þegar til borgarinnar er komið, umferðin er..ja, öðruvísi en maður er vanur  😉 Ein mynd af fararstjórum um okkar fær að fljóta með. Fararstjórnin fær fullt hús stiga, Margeir klikkar ekki á því og hélt vel utan um hópinn allan tímann. Ég mæli með því að kíkja á ferðin.is fyrir þá sem hyggja á ferðalög á þessar slóðir. Enn og aftur bestu þakkir fyrir okkur.

 

Magnea Jóhannsdóttir og Sölvi Sveinsson

Í haust fórum við með ferdin.is í góðum hópi til Tælands. Skemmst frá að segja var sú ferð einkar ánægjuleg. Allt skipulag var til fyrirmyndar, ferðin var blanda af upplifun, fróðleik, afslöppun og ánægju. Við fórum víða um landið, sáum menningarminjar og lifandi þjóðlíf. Þessir dagar voru ótrúlega fjölbreyttir. Fararstjórn var til fyrirmyndar, enginn kl. 11-12 hittingur, heldur var fararstjórinn alltaf til staðar. Í framhaldinu fórum við hjón ein til Víetnam, en ferdin.is hafði skipulagt tæplega þriggja vikna ferð þangað fyrir okkur hjón í samvinnu við þarlenda ferðaskrifstofu í samráði við okkur. Sú ferð var frábær og allt stóð eins og lagt var upp með. Það vakti athygli okkar að starfsmenn víetnömsku skrifstofunnar hringdu nokkrum sinnum í okkur til þess að fullvissa sig um að allt væri í góðu gengi. Fyrirmyndar þjónusta.

                 

Esther Guðjónsdóttir

þá erum við komin heim frá Thailandi. Vorum í frábærum hóp með www.ferdin.is og með Margeir sem farastjóra sem hélt vel utan um allt, alla ferðina og fær 10 fyrir fararstjórn. Fólkið í Thailandi er mjög indælt fólk, alltaf brosandi og vill allt fyrir mann gera og sem gott dæmi um það er að síðasta daginn okkar þarna þá ætlaði ég að eyða restinni af gjaldeyrinum á markaðinum fyrir utan hótelið og kaupa lítinn lampa sem átti að kosta 100 bat en ég átti bara 63 bat og ætlaði að prútta honum niður í það (allir prútta þarna). Sýndi ég sölumanninum peninginn og sagði ég honum að þetta væri allt sem ég ætti og ég væri að fara úr landinu um kvöldið. Hann horfði á mig í smá stund og sagði.. þú mátt eiga lampann því þú þarft að kaupa þér vatn að drekka þangað til þú ferð... ég varð hálf orðlaus og reyndi að koma peningunum á hann en hann var alveg ákveðin í að ég þyrfti vatn sem var svo sem alveg rétt og eg fékk gefins lampa. Takk allir fyrir samveruna.

 

Sigga og Valli

Þessi ferð fór langt fram úr okkar væntingum. Frábærlega vel skipulögð, hópurinn smellpassaði saman sem að skiptir svo miklu máli, fararstjórnin  í öruggum höndum hjá Margeiri og innlendi fararstjórinn var ekki síðri. 18 dagar eru málið.

Allt sem að við sáum og skoðuðum og upplifðum er eitthvað sem að lifir í minningunni alltaf. Sé fyrir mér að fólk í kringum okkur  verði búið að fá nóg af tilvitninum sem að byrja á "þegar við vorum í Tælandi.... "

Get svo sannarlega mælt með þessari ferð