Sígilda Balí Ferðin - Október 2018?

Við erum að vinna að dagsetningum með Ísl farastjórn

Í þessari viðburðaríku hringferð er umgjörðin fullkomin – þægilegt loftslag, sólin gjöful, náttúran ótrúleg og menningin framandi.
Dagarnir bjóða upp á mikla fjölbreytni, til dæmis heimsókn í sveitaþorpin þar sem hægt er að upplifa bæði hefðbundinn dans og fögur listaverk. Náttúrufegurðin á Balí algjörlega einstök og fer ekki fram hjá nokkrum manni sem heimsækir eyjuna. Síðast en ekki síst ber að nefna heimsóknir í glæsileg hof og einstakt mannlíf þar sem hindúisminn rennur saman við daglegt líf.  Að sjálfsögðu verður einnig nógur tími til að slappa af á fallegum sandströndum eyjunnar.
Í stuttu máli – góð blanda af upplifun og slökun.

Dagur 1.: Brottför frá Keflavík til Denpasar
Lagt af stað frá Keflavík með Icelandair til Kaupmannahafnar kl. 07:45 og lent í Kaupmannahöfn kl. 12:45. Þið eigið síðan flug áfram með Thai Airways til Bangkok kl. 14:25 en áætluð lending í Bangkok er kl 06:00 daginn eftir. Farangur ykkar verður innritaður alla leið frá Keflavík þannig að þið þurfið ekki að hafa áhyggur af töskunum.
Farangursheimild er 30 kg. í innrituðum farangri og 10 kg. í handfarangri. Um borð i Thai Airways eru allar veitingar fríar og boðið er bæði uppá kvöldverð og morgunverð.
Ath.: Flug og flugáætlun gæti verið önnur.

Dagur 2.: Koma til  Bangkok og haldið áfram til Bali - Sanur
Þið lendið í Bangkok kl. 06:00 og haldið áfram með Thai Airways kl. 09:35 til Denpasar en þar verður lent kl. 14:55 að staðartíma.
Þið verðið sótt á flugvöllinn, leiðsögumaður tekur á móti ykkur og fer með ykkur á hótelið þar sem þið getið slappað af það sem eftir er dagsins, hvort sem er við sundlaugina eða á ströndinni.
Gisting: Parigata Resort - Sanur (M)

Dagur 3.: Sanur
Dagurinn er á eigin vegum.  
Gisting: Parigata Resort Sanur (M)

Dagur 4.: Sanur - Ubud
Þið leggið af stað frá hótelinu ca. kl. 08.30 og keyrið norðureftir að miðhálendi eyjunnar. Hið stórkostlega landslag með vatnsmiklum fljótum og ljósgrænum hrísökrum er stórkostleg upplifun. Á leiðinni er stoppað við Batubulan, þar sem dansarar í litríkum klæðum sýna hefbundinn Barong-og Kris-dans (þjórfé ca. 300 kr ,- á einstakling, ekki innifalið í verði).  Áfram er haldið og þið komið við í tveimur bæjum sem hvor hefur sín sérkenni. Bærinn Mas er þekktur fyrir afburða góða handverksmenn, sérstaklega í tréskurði. Þorpið Celuk er miðstöð fyrir gull- og silfurvinnu á eyjunni.
Eftir að hafa skoðað listmuni og jafnvel verslað eitthvað er ferðinni haldið áfram um þessa náttúruparadís sem Bali er, til tveggja áhugaverðustu staða eyjunnar. Fyrst heimsækið þið Mæðra hofið (Pura Basakih) þar sem eldfjallatoppurinn Agung er í bakgrunni, en þar er gaman að sjá iðandi og litskrúðugt mannlífið og hátíðarklædda Balíbúa með þakkargjafir. I Klungkung, sem var höfuðborg eyjunnar í mörghundruð ár, getið þið séð fljótandi lystihús, sem var notað sem dómstóll fram á miðja 19 öld. Við komum á hótelið i Ubud seinnipart dags.
Gisting: Pertiwi Ubud (M)

Dagur 5 - 7.: Ubud
Dagarnir eru frjálsir og á eigin vegum. Upplifið rólegheitin í Ubud og stórkostlega náttúrufegurð í kring.
Gisting: Pertiwi Udbud (M)

Dagur 8.: Ubud – Candidasa
Eftir morgunverð er farið til Candi Dasa á austurströndinni. Á leiðinni verður stoppað við Fílahellinn hjá Bedulu. Síðan heimsækið þið Gianyan, sem er þekkt fyrir hin fallegu handofnu teppi. Áfram er haldið meðfram ströndinni og stoppað við Goa Lawah hofið,  sem eru mjög stórt, en í því halda til þúsundir af litlum, svörtum leðurblökum.
Hofið er einnig þekkt fyrir ævintýralegan, heilagan dreka, Naga Basuki. Farið verður um Karangasem og Tirtagangga, en það er af mörgum álitið vera þungamiðja balískrar menningar og því besta svæðið til að skoða “hið eina og sanna” Bali. Smábærinn Tenganan er mjög áhugavert að heimsækja en þar búa pre-hindúar af Bali Age ættflokknum. Þorpið liggur á hæðóttu svæði, umkringt gróskumiklum bambus skógi og sérstökum banyantrjám. Seinni partinn er áætluð heimkoma til Candi Dasa.

Gisting: Rama Candidasa (M)

Dagur 9.: Candidasa
Dagurinn er frjáls og á eigin vegum. 
Gisting: Rama Candidasa (M)

Dagur 10.: Candidasa – Lovina
Þið farið snemma um morguninn frá Candidasa og keyrið inn í landið í átt að Bangli. Fyrsta stopp er Pura Kehen, sem sagt er vera fallegasta hof á Bali. Eftir heimsókn í þorpið Pengelipuran er haldið áfram að bænum Kintamani en náttúrufegurðin á þessari leið þykir einstök. Hér er fallegt útsýni að eldfjallinu Mount Batur, sem árið 1926 gróf þennan litla bæ í ösku. Eftir hádegi komið þið að hofinu Penulisan sem er staðsett á einum af hæstu stöðum Bali.
Seinni partinn komum við til Lovina á norðurstönd Balí.

Gisting: Aditya Lovina (M)

Dagur 11: Lovina
Dagurinn er frjáls og á eigin vegum.
Gisting: Aditya Lovina (M)

Dagur 12.: Lovina – Sanur
Þið farið frá Lovina og keyrið að Gitgit fossinum, þar förum við í stuttan göngutúr. Áfram er haldið að Bratan-vatninu og stoppað við hofið Ullu Danu sem er mikið heimsótt af íbúum nærliggjandi bæja. Síðan verður haldið áfram suðureftir til Mengwi til að upplifa hið stórkostlega hof Pura Taman Ayun sem liggur við lótus vatnið. Seinni partinn komið þið að lítilli klettaeyju við ströndina þar sem hið ótrúlega hof, Tanah Lot er staðsett, en margir segja að þar hafi þeir upplifað fallegasta sólsetur í heimi.
Eftir átta daga upplifun er síðan tími kominn til að slappa af á sólarströnd.

Gisting: Parigata Resort Sanur (M)

Dagur 13 - 14.: Sanur
Dagarnir eru á eigin vegum.
Gisting: Parigata Resort Sanur (M)

Dagur 15.: Sanur – Island
Þið verðið sótt á hótelið í Sanur eftir hádegi en brottför er frá flugvellinum í Denpasar kl 17:40. Áætluð lending í Bangkok er kl. 20:50 en áfram haldið þið síðan með Thai Airways til Kaupmannahafnar kl. 01:20 eftir miðnætti og er áætluð lending í Kaupmannahöfn kl 07:40 að morgni daginn eftir.

Dagur 16: Komið til Keflavíkur
Frá Kaupmannahöfn verður haldið til Keflavíkur kl. 14:00 og er áætluð lending í Keflavík kl. 15:10, athugið að allt eru þetta staðartímar. 
Máltíðir innifaldar í flugi með Thai Airways.

Verð frá 423.900,- pr. mann í tvíbýli

Aukagjald kr. 59.000,- fyrir mann í einbýli

Allt þetta er innifalið í ferðinni:
* Flug frá Íslandi til Bali
* Með Icelandair til Kaupmannahafnar
* Með Thai Airways frá Kaupmannahöfn til Bangkok og áfram til Denpasar
* Máltíðir innifaldar í Thai Airways fluginu
* Gistingar samkvæmt leiðarlýsingu
* Allar gistingar með morgunverði
* Allar máltíðir sem tilgreindar eru í ferðalýsingu
* Allur akstur samkvæmt leiðarlýsingu
* Enskumælandi leiðsögn
* Íslenskur fararstjóri
* Aðgangseyrir og allar skoðunarferðir sem greint er frá í ferðalýsingu
* Verð miðast við lágmark 10 manns.

Verðin innihalda ekki:
• Tryggingar
• Gjafir og þjórfé
• Máltíðir og annað sem ekki er minnst á í leiðarlýsingu

M = Morgunverður, H = Hádegisverður, K = Kvöldverður

Ýtið á myndirnar hér að neðan til að skoða bæklinga